金錢觀念

哈哈，老曹用下面呢個理由來比喻人懂得止賺唔懂止蝕真係好到肉！其實每個人對金錢的觀念真的十分模糊，要好好留意！

人對金錢觀念十分模糊

假設你去睇戲發現冇咗一百元，你會否繼續去買飛睇戲？調查所得，88％人仍會繼續買飛睇戲。假設你去睇戲發現戲票失去咗，你會否買另一張飛睇戲？調查所得，只有46％失去戲飛後會去買另一張飛睇戲。一百元唔係較一張戲飛更值錢咩？原來失去戲飛嘅感覺，較失去一百元嘅感覺大一倍。人們係唔願意失去戲飛後再買另一張嘅感覺；反之，失去一百元只係猶豫一下，便又再用錢去買戲飛。人面對損失原來係咁唔理性！

另一例子，公司為獎勵員工，畀佢兩個選擇：一、三千元嘅度假計劃；二、三千元現金。結果又如何？答案係80％員工會選擇三千元現金，而唔選擇三千元度假計劃。一年後，選擇三千元現金嘅員工並唔認為公司重視佢；反之，一年後選擇三千元度假計劃嘅員工，卻認為公司對佢幾好，因為一年後佢仍然記得呢次假期好愉快。原來人對金錢嘅觀念好模糊，此乃為何奢侈品可以大量銷售。唔少人對八百元嘅感覺同八千元嘅感覺係差唔多，此所以股份可以由每股售價一元升到每股售價十元，一樣不乏買家；呢個亦係大部分人唔願止蝕理由。因買入一隻股份後失去10％市值，感覺並唔強烈，情況有如失去一百元感覺一樣；反之，失去一張戲飛竟令人感到失意。公司送三千元畀員工，員工好快便忘記；公司送員工一個愉快假期，員工可能一生難忘；但响選擇時，員工往往又取現金而放棄假期（此所以咁多人止賺唔止蝕）。喺人們心目中，一齣自己喜歡睇嘅戲嘅戲飛，較一百元現金更「值錢」；但選擇假期與現金之時，人們又往往選現金（止賺心態）。