理財三部曲

又聽老曹講理財：

只有贏家輸家冇專家

理財、理財，今天人人識講，理財三部曲：第一賺錢。如手中冇錢，談什麼理財？年輕時養成量入為出消費習慣，不要用信用卡透支消費，減少無謂支出。所謂原始資金都是如此這般累積下來的，通常需要三至五年時間才積聚原始資本。第二係錢生錢。留下應急錢、保命錢，通常佔所有本金的30％，餘下70％便可用作投資（這方面隨年紀漸長而上升，例如踏入退休年齡，這方面宜提升到70％）。第三係馬無夜草不肥、人無橫財不富。經過十年左右錢生錢遊戲後，經驗漸豐，便可動用部分資金例如全部本金40％，看準時機狠狠地賭一鋪。如果睇得準，反應快，這一次可從此改變你未來命運。金融市場只有贏家同輸家，從來冇專家！靠的是眼光，用的是腦袋，從來唔係道聽塗說。世上沒有人公開教你點樣發達的（包括我老曹）。八十年代曾追訪當年全球華人首富王永慶問佢發達之路，佢回應話木宰羊。今天各位如果問我老曹發達方法，答案一樣係木宰羊。近年股市係炒行業、炒題材。今年係炒資產重組、到內地將A股上市。許多公司講一聲資產重組，股價便平地一聲雷。有些公司由母公司注入資產，或自己分拆部分項目上市或由外國引入資產，股價即飛升。有些公司宣布有意出售資產，股價亦立即狂升。努力找尋將會資產重組的股份，可能帶來意外收穫；其次係投資那些有想像空間的公司，亦會帶來驚喜。

要學習捕捉大趨勢

帶來巨大利潤的股票（或投資），都係事前令人生厭的股份（boring stock）而非極之性感的股份，理由係呢D股份或投資通常經歷了十年甚至二十年熊市，例如2001年的黃金及資源股，當年投資界早已認定佢地不再性感。太極圖教曉我地天下事物：盛極必衰，衰極必盛。食有時，睡有時，哭有時，笑有時，所謂大勢所趨，投資便是學習點樣捕捉大趨勢。

投資者日記 曹仁超 2007-09-17