醒目資金

老曹說：

　　散戶最大缺點係冇膽賺錢，通常只滿足於10％、20％最多30％利潤而非追求100％、200％、300％甚至十倍利潤！金融市場無時無刻出現可以改變你一生嘅投資項目，可惜嗰D所謂財經分析員，一百個中只有二個有捕捉上述股份嘅水平。佢地忘記投資係追求高增長（growth）而唔係資金安全，應努力發掘明日嘅藍籌股，而唔係今天嘅藍籌股！畢非德亦响中石油（857）身上賺取400％回報，點解散戶只滿足於10％、20％最多30％利潤？請止蝕唔止賺。如大企業面對純利增長放緩，一樣唔值得揸，家吓仍有唔少二線股被分析員忽略，往往可帶來高人一等嘅回報。學做一個良好嘅Stock Picker！上述唔使大學畢業程度，只要多D留意身邊事物，用腦去分析便可。帶來驚人利潤嘅項目往往係一般人少留意者，機會之門常為你而開，問題係你有冇吉士進去。前南非總統格言─—任何事物都係不可能，直到你做到為止。發達容易，搵食艱難。大部分人仍沉迷於搵食，而唔學習點樣發達。發達唔係叫你工作太辛勞，發達唔需要天資聰敏，發達唔係要你醒目過人，只係制定計劃後嚴格遵守，一步步將夢想變成事實而已。發達係追隨醒目資金，唔係追隨群眾，因為80％人口都係中下階級、只有20％係中上階級；真正富有家庭更只佔總人口3％。Fortunes are made from trading, not from working。請好好思考呢句話。

　　香港早已過咗勤力賺錢時代，而進入炒資產升值時代。1984至97年樓價上升帶來十三年繁榮期，2003年年中利率降至1厘，又再次引發炒資產升值潮，至今仍未退潮。資產價格上升推動經濟繁榮。

　　面對美國GDP增長放緩，不但無損香港繁榮，美國同歐洲為挽救CDO市場而濫發貨幣，8月17日起又再刺激港股上升。貝南奇係研究1929年華爾街危機嘅專家，並發誓唔畀1929年危機响美國重演。相信美元短期滙價仍然向下。

　　試諗吓如果有一天起床，美國唔見咗，歐洲唔見咗，日本都唔見咗，世界經濟領袖將變成中國、俄羅斯、印度同巴西（四大金磚國）！中國從安哥拉入口石油，並派出員工到安哥拉興建基建，安哥拉答應未來十年以每桶60美元固定價格供應中國去支付基建。上述唔係夢話，而係上月上海2007年峰會嘅公布！2001年SCO成立，由中國、印度、巴基斯坦、伊朗組成，明年俄羅斯將加入該組織，成為一個冇美國同歐洲國家參加嘅組織，成員國互通有無。8月美國財長保爾森到中國要求將人民幣升值30％，中國嘅回應係減少吸納美元，結果美元滙價8月起大幅回落，中國變相話畀美國知，美元滙價有賴中國支持，唔好再提空洞嘅恐嚇！如再逼人民幣升值，首先遭殃係美國唔係中國！今天人民幣滙價毋須美國支持，反而美元滙價卻需要中國政府合作。中國經濟對美國出口依賴漸減，反之沃爾瑪所售產品，70％响中國製造。

　　滿清乾隆皇帝當年漠視大英帝國的興起，令中國經濟响工業革命浪潮中完全錯失機會。1978年鄧小平嘅改革開放政策，終於令中國呢條巨龍擦亮眼睛，放眼世界。今天中國仍然不能睇唔起美國、歐洲同日本，但只要趨勢維持多三十年，中國可同佢地並駕齊驅，六十年後甚至超越亦唔奇。